Waziri Ummy awatoa hofu ndugu wa majeruhi wa ajali ya moto

Wazira wa Afya, Maendeleo ya Jamii, Jinsia, Wazee na Watoto, Ummy Mwalimu, amewatembelea majeruhi wa ajali ya moto iliyotokea mkoani Morogoro wanaoendelea kupatiwa matibabu katika hospitali ya Taifa ya Muhimbili (MNH).

Wakati huo huo ameipongeza Hospitali ya Taifa ya Muhimbili(MNH) kwa huduma nzuri inayotoa kwa majeruhi hao, kwa kuwa wengi waliohamishiwa hospitalini hapo kutoka Morogoro ni wale ambao waliungua kwa kiasi kikubwa sana.

Pia amewatoa wasiwasi ndugu na jamaa wa majeruhi ambao wanaendelea kupatiwa matibabu hospitalini hapo kuwa aina ya matibabu wanayopatiwa ni ya kiwango cha juu.

Pia ameielekeza Hospitali ya Taifa Muhimbili kubadili kitengo cha matibabu ya ajali za moto kuwa kituo maalumu cha kushughulikia ajali za moto.

Akielezea maendeleo ya hali za majeruhi hao, Mkuu wa idara ya magonjwa ya dharura hospitalini hapo Dkt. Juma mfinanga amesema kuwa kwa sasa hivi idadi ya majeruhi ni 21 kati ya 46 waliopokelewa na wote wamehamishiwa katika wodi inayohitaji uangalizi maalum (ICU) kwa ajili ya ufuatiliaji wa karibu wa afya zao.