HESLB imetoa orodha ya waombaji mikopo kwa mwaka wa masomo 2019/2020 ambao fomu zao zina upungufu ili wafanye marekebisho kwa siku nne kuanzia Jumatatu tarehe 30 Septemba 2019 ambapo pia mwongozo wa jinsi ya kufanya marekebisho utatolewa..
Hatua ya HESLB inafuatia kukamilika kwa uhakiki wa maombi ya mikopo ambapo imebainika baadhi ya fomu za maombi ya mikopo zina upungufu unaozuia kuendelea na hatua ya kupangiwa mikopo.
Upungufu huo ni pamoja na kukosa nyaraka ama viambatanisho vilivyothibitishwa na mamlaka husika na saini za waombaji na wadhamini wao.
Orodha hii ni ya wanafunzi wanaokwenda kusoma masomo ya Shahada ya kwanza. Orodha ya waombaji mikopo watakaojiunga na Shule ya Sheria (Law School of Tanzania), Shahada za Uzamili na Uzamivu itatolewa kesho Jumatatu tarehe 30 Septemba 2019.
Ili kuona orodha ya majina na marekebisho yanayohitajika *bofya hapa.*
Mamlaka ya Vitambulisho vya Taifa (NIDA) imewarahisishia wananchi kwa kuweka utaratibu mpya wa kuipata namba ya utambulisho wa Taifa (NIN) kwa njia ya mtandao.
Taarifa iliyotolewa na Nida jana Jumatano Septemba 25, 2019 kupitia kitengo cha mawasiliano na hifadhi hati ilisema namba hiyo sasa imeanza kutolewa kupitia tovuti ya mamlaka hiyo kwa muombaji kutembeleahttps://services.nida.go.tz/nidportal/get_nin.aspx
Taarifa ya Nida ilibainisha kwamba huduma hiyo itawarahisishia waombaji wa vitambulisho vya Taifa kupata NIN bila kwenda ofisi za mamlaka hiyo.
Hatua za kufuta kupata namba ya NIN
1.Bonyeza kitambulisho cha Taifa
2.Fahamu namba ya utambulisho wa Taifa
3.Andika jina lako la kwanza, jina la ukoo, tarehe ya kuzaliwa, jina la kwanza la mama na jina la mwisho la mama
Bodi ya Mikopo ya Wanafunzi wa Elimu ya Juu (HESLB) inapenda kuwajulisha waombaji wote wa mikopo kwa mwaka wa masomo 2019/2020 kuwa kwa sasa HESLB inaendelea na kazi ya uhakiki (verification of online-submitted applications) wa maombi yaliyowasilishwa ambayo itakamilika Jumapili, Septemba 29, 2019.
Baada ya kukamilika kwa kazi ya uhakiki, HESLB itatoa fursa ya siku nne, kuanzia Jumatatu, Septemba 30 hadi Alhamisi, Oktoba 3, 2019 kwa waombaji mikopo ambao maombi yao yatakuwa yamebainika kuwa na upungufu kufanya marekebisho.
Taarifa hii inatolewa kufuatia HESLB kupokea maoni na maswali kupitia barua pepe na simu kuhusu hatua iliyofikiwa katika uhakiki na uchambuzi wa maombi ya mikopo ya elimu ya juu yaliyowasilishwa HESLB.
Waombaji mikopo wote wanashauriwa kutembelea tovuti yetu (www.heslb.go.tz) au kuingia katika akaunti zao waliozoombea mkopo kupitia mfumo wa uombaji mkopo (www.olas.heslb.go.tz) kuanzia Septemba 30, 2019 ili kupata mwongozo wa kufanya marekebisho kwa njia ya mtandao. Baada ya kuingia, watapata ujumbe iwapo maombi yao yamekamilika au yanahitaji marekebisho.
HESLB imejipanga kuhakikisha kazi yote ya uhakiki na uchambuzi wa maombi yote ya mikopo inakamilika ifikapo Oktoba 6, 2019 ili wanafunzi wahitaji wapangiwe mikopo, wapate taarifa na fedha za mikopo zitumwe vyuoni kabla ya vyuo kufunguliwa katika wiki ya kwanza ya mwezi Novemba, 2019.
Waziri wa Elimu, Prof. Joyce Ndalichako, amewataka wanafunzi waliosoma Shule binafsi kwa ufadhili na hawakujaza vizuri taarifa zao za uombaji wa mkopo, wawasiliane na Bodi ya Mikopo, iangaliwe kama kuna uwezekano wa kupata fursa hiyo.
Waziri Ndalichako amesema hayo leo Septemba 22, 2019, katika ibada ya Jumapili ya uzinduzi wa juma la elimu katika Kanisa la KKKT Dayosisi ya Mashariki na Pwani, ambapo amesema ipo dhana kuwa waliosoma shule za bianfsi hawawezi kupata mikopo, jambo ambalo si sahihi.
"Kama kuna Mwanafunzi yeyote ambaye alikuwa anasoma shule binafsi kwa ufadhili, na katika fomu kuomba mkopo, alisahau kuweka hiyo taarifa awasiliane na Bodi ya Mikopo,ili tuone namna ya kumwezesha, kuna wakati wanafunzi wanakosa mikopo kwa kutojaza kwa usahihi." amesema Ndalichako
Amesema kuwa Serikali ipo tayari kuwapatia mikopo wanafunzi wote waliosoma kwa ufadhili, kutokana na wao kushindwa kujilipia gharama za masomo, ili mradi wahakikishe wanajaza taarifa sahihi.
Imepita miaka 107 lakini dunia imeshindwa kuhusahau usiku wa umauti, Ulikuwa usiku wa kiza kinene kwenye bahari yenye kina kirefu, bahari ya Atlantic, Ilikuwa Aprili 14 mwaka 1912 Usiku ambao meli kubwa zaidi kwenye historia ya Dunia ilizama, Meli ya Titanic
Bonyeza play hapa chini kutazama zaidi pia tembelea app hii kila Mara kusoma habari mpya
Mnamo mwaka 1808, gari la kwanza duniani liligunduliwa ambapo injini yake ilitengenezwa kwa mchanganyiko wa hidrojeni na oksijeni.
Aliyegundua gari hilo alijulikana kwa jina la Isaac De Rivaz raia wa Ufaransa na Uswiz, hata hivyo aina hiyo ya gari alilogundua haikufaulu katika matumizi yake, Pia wagunduzi wa Kimarekani, Samuel brown na Samuel Murray walishindwa kufaulu vizuri kama mgunduzi wa kwanza.
François Isaac de Rivaz (Desemba 19, 1752 – Julai 30, 1828)
Baada ya miaka 24, Entiene Noire alifanikiwa kutengeneza injini lakini baada ya kuiweka kwenye gari ilikuwa ikifanya kazi taratibu kuliko hata binadamu. Mnamo mwaka 1886 Januari 26, Mgunduzi wa Kijerumani aligundua gari aina ya Karl Benz yenye ‘gasoline auto motor’ huko Ujerumani, na Karl Benz ndiye aliyekuwa wa kwanza kuanzisha msingi wa viwanda vya magari ya aoutomatic duniani, alitengeneza gari yenye matairi matatu kama gari ya kihistoria jijini kwake ‘roam’.
Karl Benz
Baada ya hapo Gottlieb Daimler aligundua gesi na kutengeneza gari lake kwa kutumia hiyo gesi. Mwaka huo huo Machi, aina hiyo ya gari kwa mara ya kwanza ilitengenezwa yenye matairi manne, yenye enjini inayotumia mafuta mengi na ilikuwa tayari kutangazwa.
1889 Daimler alitambulisha injini mpya na baada ya mwaka mmoja Daimler aliitangaza rasmi Daimler kama kampuni yake mpya ya uzalishaji magari aina ya Daimler huko Ujerumani katika mji wa Stuttgart ili kuanza ushindani na makampuni mengine ya uzalishaji magari.
Pango la miza wa miza visiwani Zanzibar ni miongoni mwa sehemu zinazodaiwa kuakisi athari za wivu ikisadikiwa kuwa mwanamke mmoja alisababisha mke mwenzie kugeuka jiwe baada ya kukiuka masharti wakati wakichota maji kwenye pango hilo.
Bonyeza play hapa chini kutazama zaidi pia tembelea app hii kila Mara kusoma habari mpya
Utafiti wa miaka ya karibuni katika anga za juu, umeonesha uwepo wa sayari nyingine nje ya mfumo wetu wa jua (Solar System), ambazo zinatajwa kuwa na uwezo wa kuruhusu uhai kwa wanyama na mimea lakini ugumu umebaki kuweza kuzifikia.
Unaambiwa kama chombo kitaweza kwenda spidi ya maili 35,000 kwa saa, itachukua miaka 40,000 kuweza kuikaribia sayari mojawapo, lakini inaelezwa uwepo wa ugumu wa kupita hata karibu ya Sayari hizo sababu zikitajwa ni uwepo wa mgandamizo mkubwa wa hewa pamoja na gesi nzito.
Utafiti mwingine wa hivi karibuni umegundua uwepo wa unyevu nyevu wa maji maeneo ya Sayari hizo, hivyo kuongeza uwezekano wa kuruhusu uhai kwa wanyama na mimea japo hiyo haitoi picha moja moja kwa sababu uwepo wa uhai hautegemei uwepo wa kitu kimoja bali vitu vingi.
Unyevu nyevu wa maji umegundulika katika sayari ya K2-18b ambayo kiumbo ni kubwa zaidi ya Sayari ya Dunia, lakini ina mfanano wa ukaribu wa hali ya hewa huku kukihisiwa kuwepo pia kwa vyanzo kama Bahari, Maziwa na Mito.
Mpaka sasa zimegundulika zaidi ya Sayari 2,000 ambazo zipo nje ya mfumo wetu wa Jua (Solar System), lakini imebaki kuwa ndoto kuzifikia sababu ya teknolojia iliyopo pamoja na ufinyu wa tafiti kuhusu maeneo hayo.
Katika kipindi cha mwaka 2016/17 hadi 2018/19 Serikali ya Tanzania imeajiri watumishi 7,515 katika shule za sekondari nchini humo.
Kati ya watumishi hao, walimu walikuwa 7,218, fundi sanifu maabara 297 huku tatizo bado jambo ambalo limewafanya Ofisi ya Rais, Tawala za Mikoa na Serikali za Mitaa (Tamisemi) kuomba kibali cha kuajiri walimu 15,000.
Akijibu swali bungeni leo Jumatano Septemba 11, 2019, Naibu Waziri wa Tamisemi, Mwita Waitara ameliambia Bunge la Tanzania kuwa kati ya walimu walioajiriwa, 29 walikuwa wenye mahitaji maalumu, 50 elimu maalumu wakati masomo ya sayansi na hisabati walikuwa 7,089 ambapo Lugha (literature in English) wamepangwa 100.
Naibu Waziri alikuwa akijibu swali la msingi la Mbunge wa Viti Maalum (CCM) Anna Lupembe ambaye amehoji ni lini Serikali itapeleka walimu wa sayansi katika mko wa Katavi.
Waitara amesema katika kipindi hicho Mkoa wa Katavi ulipangiwa watumishi 121 katika shule za sekondari ambapo walimu wa masomo ya sayansi na hisabati ni 115 na fundi sanifu walikuwa sita.
Baraza la Mitihani la Taifa (NECTA), limetangaza kuanza kwa mitihani ya kuhitimu Darasa la Saba kwa watahiniwa 947,221, huku wavulana wakiwa 451,235 na wasichana wakiwa ni 495,986.
Akitangaza tarehe ya Mtihani huo Katibu Mtendaji wa Baraza hilo Dkt Charles Msonde, amewataka wasimamizi wa Mitihani, wazazi na wamiliki wa shule kutojihusisha na vitendo vya udanganyifu kwani hawatosita, kuchukua hatua kwa yeyote atakajihusisha na vitendo hivyo, sanjari na kukumbusha umuhimu wa watoto wenye mahitaji maalumu.
''Wasimamizi wahakikishe wanalinda haki ya watahiniwa wenye mahitaji maalumu kwa kuwapa mitihani yenye nukta nundu, maandishi yaliyokozwa pamoja na kuwaongezea muda wa dakika 20 kwa kila saa kwa somo la Hisabati na dakika 10 kwa masomo mengine'', amesema Dkt Msonde.
Aidha kati ya watahiniwa waliosajiliwa kufanya mtihani huo kuanzia kesho Septemba 11 hadi 12, watahiniwa 902,262 watafanya kwa lugha ya Kiswahili, huku wengine takribani 44,959 wakifanya mtihani kwa lugha ya Kiingereza.
Daktari bingwa wa upasuaji katika Hospitali ya Taifa ya Muhimbili (MNH), Endwin Mrema, ameishauri jamii kuacha kumtibu majeruhi wa moto kwa asali na mafuta badala yake watumie njia ya kumwagia majeruhi maji zaidi ya dakika 15. alisema hatua hiyo inasaidia mwili wa mtu aliyeungua kupoa kutokana na joto alilopata.
“Kuna vitu watu wanafanya kutokana na kutokuwa na uelewa au elimu, mfano mtu akiungua wengine wanampaka asali, kinyesi cha sungura, wengine unga wa muhogo, hivi vitu vyote havisaidii kwa mtu aliyeungua.
“Ukiona mtu kaungua moto mtoe mpeleke mbali na ummwagie maji kama dakika 15 hadi 20 kama amevaa saa, pete, cheni, hereni chochote kile cha chuma mvue kwa sababu mwili bado una joto na vitu vya chuma vinachukua muda mrefu kupoa, kumwagiwa maji itasaidia mwili kupoa haraka,” alisema Dk. Mrema.
Alisema baada ya majeruhi kupatiwa huduma hiyo awahishwe katika kituo cha afya kilichopo karibu ili aweze kupatiwa huduma za kitaalamu zaidi.
“Kwa matibabu ya kitaalamu huwa tunawapa maji, chumvichumvi, dawa za maumivu, kuna Cream ambazo tunawapaka, pia tunawafunga kwa gozi na bandeji. Upasuaji ni hatua ya baadaye kama itahitajika,” alisema.
Alishauri kuwa endapo mtu ataungua hata kwa kiwango kidogo asipuuzie, badala yake aende hospitali akapate matibabu zaidi.
Wanasayansi kutoka maabara ya Bristol Robotics, Uingereza mwaka 2017 waligundua njia mpya ambayo unaweza kuchaji simu kwa kutumia mkojo wako.
Ili kuzalisha umeme walitengeneza kifaa maalum walichokipa jina la 'microbial fuel cell' ambacho kina bakteria wenye uwezo wa kuchuja chembechembe zote zinazopatikana katika mkojo na kubakiza elekroni maalum ambazo hubadilishwa kwaajili ya kuwa umeme kwaajili ya matumizi.
Lita mbili za mkojo zina uwezo wa kuzalisha nguvu ya umeme ya kiasi cha 30 mpaka 40 Milliwati ambayo inaweza kuiwasha simu, kuwasha taa na vifaa vingine vinavyotumia umeme.
Mpaka sasa uvumbuzi huo umezidi kufanyiwa utafiti kuhakikisha unaweza kuzalisha umeme mkubwa zaidi, huku malengo yake ni kwa nchi zinazoendelea ili kusaidia katika utunzaji wa mazingira na kupunguza ukosefu wa umeme unaozikabili nchi hizo.
Balaza la Taifa la Elimu ya Ufundi (NACTE) limetangaza kuongeza muda wa udahili kwa waombaji mafunzo kwa ngazi ya Cheti na Diploma kwa kufungua dirisha dogo la udahili kwa lengo la kuwapa nafasi wale ambao hawakupata nafasi katika udahili wa kwanza au kukosea chaguzi wanazostahili.
Akiongea na waandishi wa habari jijini Dodoma, Katibu Mkuu Wizara ya Elimu Sayansi na Teknologia, Dkt Leonard Akwilapo, amesema wameamua kuongeza mda wa udahili kwa sababu wanatambua kuna idani kubwa ya waombaji hawakupata nafasi na wengine walikosa sifa kwa kozi husika waliyoiomba.
“Wizara imeagiza balaza la taifa la elimu ya ufundi (NACTE) kufungua dirisha dogo la udahili kuanzia tarehe 7 mpaka tarehe 21 Septemba, 2019, ili kujaza nafasi zilizo kwenye vyuo na taasisi mbalimbali za mafunzo za serikali na binafsi katika kada mbalimbali ambazo zina nafasi ya udahili” amesema Dkt Akwilapo.
Aidha amesema Wizara inatoa rai kwa wahitimu wa kidato cha nne na sita, na wale wote waliokosa sifa za kujiunga na mafunzo mbalimbalikutumia fulsa hiyo kufanya maombi ya udahili upya, waombaji wametakiwa kuwa makini ili wasije kukosa nafasi ya kujiunga na mwaka wa masomo kwa mwaka 2019/2020.
Aidha amebainisha kuwa kwa waombaji wa kozi ya ualimu kwa ngazi za cheti na Diploma udahili ulianza tarehe 3 mwezi wa saba hadi tarehe 30 mwezi wa Nane, 2019, waombaji walielekezwa walielekezwa kuomba kupitia tuvuti ya NACTE kwa waombaji wa vyuo vya serikali na vyuo binafsi walielekezwa kuomba moja kwa moja vyuo wanavyotaka.
“Lakini hadi mwisho wa tarehe ya udahili, waomba walikuwa 7,025 waliokamilisha maombi yao, na waliokidhivigezo walikuwa 5,252(75%) na 1,773(25%) hawakuwa na sifa zinazotakiwa kujiunga na mafunzo ya ualimu, wakati nafasi zilikuwa 12,859 katika vyuo 35 vinavyotoa mafunzo hayo,” amesema.
Pia amebainisha jumla ya waombaji 11,028, walichaguliwa na Ofisi ya Rais Tawala za Mikoa na Serikali za mitaa (TAMISEMI) na NACTE na kupangiwa vyuo vya mafunzo ya ualimu na majina yao yanapatikana kwenye tuvuti ya ya Wizara na NACTE.
Kwa upande wake Mkuu wa kitengo cha udahili wa NACTE, Twaha Twaha, amewatahadharisha waombaji hasa wa kitengo cha Nessing na Clinical Medicine lazima wawe na ufaulu katika masomo ya Physics, Chemistry na Biology lazima vizingatiwe katika maombi.
Rais wa zamani wa Zimbabwe, Robert Mugabe, amefariki dunia akiwa na miaka 95 nchini Singapore.
Tangu aondoshwe madarakani na makamu wake wa rais Emmerson Mnangagwa mnamo November 2016 imekuwa nadra sana kuonekana hadharani.
Amekuwa kiongozi wa Zimbabwe tangu mwaka wa 1980.
Alikuwa Waziri Mkuu hadi 1987 alipochukua usukani kama rais wa nchi hiyo. Utawala wake umeshutumiwa kwa ukandamizaji wa upinzani, ukiukaji wa sheria za uchaguzi, na kusababisha uchumi wa nchi kuanguka.
Yafuatayo ni mambo tisa ambayo huenda hukuwa unayajua kumhusu kiongozi huyu.
1) Hapendi kushindwa
Alipokuwa kijana, Mugabe alikuwa mmakinifu na mzuri kabisa katika mchezo wa tenisi, kulingana na aliyekuwa mwalimu katika shule ya Wakatoliki alikosomea Mugabe. Ila, aliposhindwa katika mchezo huo, aliitupa raketi yake chini kwa hasira.
Mugabe amekiri kuwa hakuwa mzuri katika mchezo wa kandanda alipokuwa mdogo, ila kwa sasa, anapenda kuutazama mchezo huo.
Yeye ni shabiki wa klabu za Chelsea na Barce
2) ‘Kufufuka’
Kuhusu afya yake, Mugabe alipohojiwa wakati mmoja alisema,” Nimekufa mara nyingi-hapo ndipo nimemshinda Yesu Kristo. Yesu alikufa mara moja, na akafufuka mara moja,” alisema alipotimiza miaka 88.
Ingawa alilelewa katika familia ya Kikatoliki, alisema alipohojiwa na kituo cha habari cha Afrika Kusini, SABC, miaka michache iliyopita, kuwa yeye si Mkristo anayetumikia dini kwa sana.
3) Shabiki mkubwa sana wa kriketi
Kwa muda mrefu amedhihirisha hadharani mapenzi ya mchezo wa kriketi. Ni mlezi wa jumuiya ya mchezo wa kriketi wa Zimbabwe na nyumba yake ipo karibu na uga wa michezo wa Harare.
“Kriketi yafanya watu wawe wangwana, na pia inawafanya watu kuwa wema,” Bw Mugabe alisema miaka kadhaa baada ya Zimbabwe kujinyakulia uhuru. “Nataka kila mtu acheze kriketi Zimbabwe; nataka nchi ya Zimbabwe iwe nchi ya wangwana.”
4) Mazoezi na vyakula vya kienyeji
Mugabe anapenda kufanya mazoezi. “Mimi hujihisi mgonjwa wakati sijafanya mazoezi ya viungo vya mwili,” Bw Mugabe alisema miaka sita iliyopita. Huwa anaamka kati ya saa kumi na kumi na moja alfajiri. Siri nyingine ya maisha yake marefu ni kuwa anapenda sana ‘sadza’ – chakula cha kienyeji kinacholiwa sana Zimbabwe, na ambacho kina virutubisho vingi muhimu. Vilevile havuti sigara, ingawa hunywa pombe kidogo anapokula chakula cha jioni.
5) Alipata mtoto akiwa na miaka 73
Ana watoto watatu na mke wake wa pili, Grace Marufu, aliyekuwa karani wake. Mtoto wao wa tatu alizaliwa 1997, mwaka mmoja baada ya wao kufunga ndoa.
Mwanawe wa kwanza, Nhamodzenyika, alikufa kutokana na Malaria akiwa na umri wa miaka mitatu Mugabe alipokuwa mfungwa wa kisiasa wa serikali ya enzi hiyo ya Rhodesia.
6) Anampenda Cliff Richard kuliko Bob Marley
Mwanasiasa wa Zimbabwe ambaye kwa sasa ni hayati, Edgar Tekere, alimwambia mwandishi wa BBC, Brian Hungwe, kuwa alipokuwa akitayarisha kadhia ya kusherehekea uhuru wa Zimbabwe 1980, Mugabe hakumtaka mwimbaji Bob Marley aalikwe kutumbuiza watu, ila alimtaka muimbaji maarufu wa Uingereza, Cliff Richard. Pia anampenda Mwimbaji, Jim Reeves.
7) Mvaaji wa nguo maridadi
Anapenda sana suti zinazoutosha mwili wake sawasawa na tai zinazofanana na kitambaa. Huwavutia sana wanamitindo nchini Zimbabwe kwa mavazi yake.
8) Anamtazama Kwame Nkrumah kama kielelezo kwake
Bw Mugabe alipata azma ya siasa akiwa Ghana alipokuwa mwalimu; mahali alipokutana na mke wake wa kwanza, Sally Hayfron.
Aliporudi Zimbabwe, aliwaambia wananchi jinsi Ghana ilivyojinyakulia uhuru na jinsi uhuru ni kitu kizuri.
Katika mahojiano mwaka 2003, Mugabe alisema: “Niliwaambia pia kuhusu Kwame Nkrumah jinsi alivyojitolea na kuiongoza Ghana kupata uhuru; Kwame aliwaambia wananchi wa Ghana kuwa Ghana haingekuwa nchi huru bila ya jitihada na kujitolea kwa kila mtu.
9) Ni mtu mwenye shahada nyingi
Kwa jumla, Mugabe ana shahada saba. Digrii yake ya kwanza ni kutoka chuo kikuu cha Fort Hare, Afrika Kusini. Alisomea shahada zake nyingine kupitia mtandao akiwa gerezani.
Shahada hizo ni za: elimu, sayansi, sheria na usimamizi.
BUNGE limeelezwa kuwa hakuna ubaguzi wowote katika utoaji wa mikopo ya wanafunzi wa elimu ya juu kwani hutolewa kwa wanafunzi watanzania wote wenye uhitaji na walioomba mikopo wa kuzingatia sheria taratibu na vigezo vilivyowekwa.
Hayo yamesemwa jana bungeni na Naibu Waziri wa Elimu,Sayansi na Teknolojia William Ole Nasha wakati alipokuwa akijibu swali la mbunge wa Viti maalum (CCM) Halima Bulembo ambapo alisema kuwa ni vema waombaji wakazingatia maelekezo yanayotolewa na bodi wakati wa uombaji wa mikopo ikiwa ni pamoja na kujaza taarifa zao kwa usahihi na kuambatanisha nyaraka zote muhimu.
Katika swali lake Mbunge Halima amesema kuwa Je,ni kwanini mikopo ya wanafunzi wa chuo kikuu imekuwa ikitolewa kwa ubaguzi.
Akijibu swali hilo Mhe.Ole Nasha amesema kuwa mikopo ya wanafunzi wa elimu ya juu hotolewa kwa mujibu wa sheria ya bodi ya mikopo (sura 178) ambayo inabainisha sifa za msingi.
Sifa hizo ni pamoja na awe mtanzania aliye dahiliwa katika masomo ya shahada katika taasisi inayotambuliwa na serikali,na asiwe na vyanzo vingine vinavyogaramia masomo yake,na kwa mwanafunzi anayeendelea na masomo awe amefaulu kuendelea na masomo katika mwaka unaofuata.
“Kwa mujibu wa sheria ya bodi ya mikopo ya wanafunzi wa elimu ya juu,bodi inamamlaka ya kuweka utaratibu wa kubaini wahitaji,hivyo bodi huandaa mwongozo unaoweka masharti kwa waombaji pamoja na maelekezo juu ya mambo muhimu ya kuzingatiwa kwa waombaji ambao yatima,wenye ulemavu au wenye wazazi wenye ulemavu,na wale ambao masomo yao ya sekondari au stashahada yalifadhiliwa na maelekezo hayo ni pamoja na kuambatanisha uthibitisho wa hali zao”amesisitiza
Jumla ya wanafunzi 1674 kati ya wanafunzi 1,861 waliokuwa wanasuburi chaguo la pili la kujiunga na kidato cha tano, wamepewa nafasi hiyo baada ya kuwa na sifa zinazotakiwa.
Hayo yalibainishwa jana na Waziri wa Nchi, Ofisi ya Rais, Tawala za Mikoa na Serikali za Mitaa, Mhe. Selemani Jafo wakati akiongea na waandishi wa habari kuhusiana na uchaguzi wa wanafunzi katika chaguo la pili( Second Selection).
Amesema kuwa wanafunzi 187 wameshindwa kuchanguliwa kutokana na tahasusi (combination) zao kutokuwa na ulinganifu unaotakiwa.
Mhe. Jafo amesema kuwa kati ya wanafunzi 1,674 waliochaguliwa ni wanafunzi 1497 ambao wamepangiwa masomo ya sanaa na biashara wakati wanafunzi 178 watajiunga na masomo ya sayansi na hisabati.
Akifafanua zaidi amesema wanafunzi hao wanatakiwa kuanza kuripoti katika shule walizochaguliwa kuanzia Septemba 2 hadi 16 mwaka huu na kuwa watakaoshindwa kufanya hivyo watakuwa amepoteza nafasi hiyo.
“Pia nitoe wito kwa wanafunzi 187 ambao wameshindwa kuchaguliwa kwasababu ya tahasusi zao kutokuwiana (balance) waombe kusoma kwenye vyuo vya ufundi ambayo vinasimamiwa na Baraza la Vyuo vya Ufundi (NACTE).
Hivi karibuni Jafo alitangaza uchaguzi wa wanafunzi wa kijiunga na kidato cha tano awamu ya kwanza na kubainisha kuwa jumla ya wanafunzi 108,644 ambao ni sawa na asilimia 98.31, walichaguliwa kujiunga na kidato cha tano na vyuo vya ufundi ikiwa ni kati ya wanafunzi 110,505 wenye sifa.
Mhe. Jafo alisema kuwa kati ya wanafunzi hao, wanafunzi 69,356 ambapo wasichana ni 31,809 na wavulana 37,547 wamechaguliwa kujiunga na kidato cha tano ambao ni sawa na asilimia 62.76 ya wanafunzi 110,505 ya waliokuwa na sifa
Waliochaguliwa kujiunga kidato cha tano kuwa ni 35,703 waliochaguliwa tahasusi ya Sayansi na Hisabati, kati yao wasichana ni 14,876 na wavulana 20,827 huku wa tahasusi ya Sanaa na Biashara ni 33,653, wasichana wakiwa ni 16,934 na wavulana ni 16,719.
Waliojiunga na shule za wanafunzi wenye ufaulu mzuri zaidi (vipaji maalum) ni 1,462 ambapo wasichana ni 646 na wavulana 816. “miongoni mwao wanafunzi 6 ni wenye mahitaji maalumu ambao wasichana ni watatu na wavulana watatu.
Alisema wanafunzi wenye mahitaji maalumu waliochanguliwa ni 157 ikiwa wasichana ni 74 na wavulana ni 86 wakati wanafunzi waliochanguliwa ambao waliosoma chini ya taasisi ya Elimu ya Watu Wazima ni 174 ikiwa ni wasichana 74 na wavulana 100.
Aidha Mhe. Jafo ametoa wito kwa wanafunzi waliopangwa awamu ya pili kuripoti kuanzia tarehe 2 Septemba, 2019 na wanafunzi watakaoshindwa hadi kufikia tarehe 16 Septemba, 2019 atakuwa amepoteza nafasi yake
