Mkurugenzi ATCL aelezea Bombardier iliyoharibika

Shirika la Ndege Tanzania (ATCL), limesema ndege aina Bombardier Q400 iliyokuwa katika matengenezo imeanza kufanya safari zake kama kawaida.

Akizungumza katika kipindi cha Power Breakfast cha  Clouds, Mkurugenzi wa Shirika hilo, Ladslaus Matindi amesema taarifa zilizosambaa katika mitandao ya kijamii zikionyesha picha ya ndege hiyo ikiwa katika matengenezo.

“Ndege inaweza kuharibika, kupata hitilafu au kuingiliwa na kitu kutoka nje muda wowote kwakuwa ni mashine hakuna namna ya kuzuia hilo ni jambo la kawaida kwa mashine hata binadamu,” amesema Matindi.

“Ndege zinazoharibika sio za ATCL  pekee bali popote hata KLM ndege zao huwa zinaharibika, British Airways na Emirates wakisema ndege zao hazijawahi kuharibika ndipo tujiulize kwa nini zetu ziharibike.”

Aidha amesema kuwa ndege hiyo ipo Dar es Saalam tangu jana na matengenezo yake yalichukua siku moja, akibainisha kuwa yalianza Jumatatu mchana hadi jana mchana, “Usiku jana iliruka kurudi Dar es Salaam.”