Zahera kumaliza usajili Misri

Yanga imeanza usajili wake mapema tu kuhakikisha inakuwa na kikosi imara kitakacholeta ushindani kwenye michuano ambayo timu hiyo itashiriki msimu ujao

Wakati inaanza usajili, taarifa ya kushiriki michuano ya CAF haikuwepo lakini mambo huenda yakabadilika baada ya mabingwa hao wa kihistoria kuhakikishiwa nafasi ya kushiriki michuano ya ligi ya mabingwa msimu ujao baada ya CAF kuongeza idadi ya timu kwa Tanzania kutoka mbili na kuwa nne

Inaelezwa kocha Mwinyi Zahera ataitumia michuano ya AFCON 2019 inayoanza Juni 21 nchini Misri kupata wachezaji wa kujaza nafasi zitakazokuwa zimebaki

Mpaka sasa wachezaji wa kigeni ambao wanatajwa kusajiliwa na Yanga ni Lamine Moro, Patrick Sibomana, Issa Birigimana, Sadney Urikhob, Mustapha Suleyman, Maybin Kalengo, Farouq Shikalo na Papi Tshishimbi

Zahera amesema baada ya kupata nafasi hiyo ya kushiriki michuano ya Kimataifa msimu ujao, wanahitaji kuwa na kikosi imara kitakachokuwa na ushindani

Amewataka wadau wa klabu hiyo waendelee kuisapoti timu kwa kushiriki kikamilifu Harambee ya Kubwa Kuliko itakayofanyika Jumamosi ijayo ukumbi wa Diamond Jubilee jijini Dar es salaam

"Bado tunaendelea kuangalia wachezaji wa kiwango cha juu, tutaangalia Afcon na hata CHAN, tuna uwezo wa kusajili mchezaji yeyote yule, tunawaomba mashabiki na wanachama wa Yanga waendelee kuisapoti klabu yao, wajitokeze kwenye Harambee ya kuichangia timu ili tupate fedha zaidi za kusajili" amesema