Stars yasubiri muujiza dhidi ya Algeria, inaweza kusonga mbele

Timu ya Taifa ya Tanzania 'Taifa Stars' Jumatatu itakamilisha safari yake ya ushiriki wa michuano ya Afcon 2019 kwa kuumana na Algeria katika mchezo utakaopigwa saa nne usiku

Mchezo huo utapigwa wakati mmoja na mchezo mwingine wa kundi C kati ya Kenya dhidi ya Senegal

Miujiza inaweza kuibeba Tanzania inayoshiriki michuano ya Afcon kwa mara ya pili, kutinga hatua ya mtoano kama itaifunga Algeria huku Kenya ikipoteza dhidi ya Senegal

Kuelekea mchezo huo Watanzania wanapata matumiani japo yanaweza kuwa madogo kutokana na ukweli kwamba watachuana na Algeria ambayo tayari imefuzu hatua ya mtoano

Kwa Algeria mchezo huo utakuwa wa kukamilisha ratiba tu

Lakini hali ni tofauti kwa majirani zao Kenya ambao watacheza na Senegal ambayo inahitaji kushinda ili kujihakikishia nafasi ya kutinga hatua ya mtoano ambayo ni hatua ya 16 bora

Algeria inaongoza kundi C ikiwa na alama sita baada ya kushinda michezo yote miwili

Inafuatiwa na Senegal yenye alama tatu sawa na Kenya lakini Senegal ikiwa na uwiano mzuri wa mabao

Tanzania haina pointi lakini kama itapata ushindi mnono dhidi ya Algeria na Kenya kupoteza dhidi ya vigogo namba moja barani Afrika Senegal, inaweza kupenya hatua ya mtoano kupitia 'best looser'