BREAKING: BABA LEVO AHUKUMIWA KWENDA JELA MIEZI MITANO

Mahakama ya Mwanzo ya Mwandiga mkoani Kigoma imeamuru kwenda jela miezi 5 Diwani wa Kata ya Mwanga Kaskazini, Claiton Levocatus Chipando (Baba levo), kwa kosa la kumshambulia Askari wa Usalama barabarani, Msafiri Ponera.

Akitoa hukumu hiyo, Hakimu Frolence Ikorongo amesema Mahakama imetoa uamuzi huo baada ya kujiridhisha bila shaka, kwa kutumia ushahidi wa upande wa mlalamikaji, na kutupilia mbali utetezi wa Baba levo.

Awali Mahakama ilitoa uamuzi wa mshtakiwa Baba Levo, kwenda jela mwaka 1 ndipo akajitetea kwa kuiomba Mahakama impunguzie adhabu, kwani anategemewa na watoto 4 pamoja na  wananchi zaidi ya 25000.

Baba Levo ameendelea kujitetea kuwa endapo atafungwa mwaka 1 atapoteza sifa za kuendelea kuwa Diwani, hivyo ataisababishia Serikali hasara ya kufanya uchaguzi upya, na kwamba ni mara ya kwanza kukutwa na kosa la shambulio
 
Baada ya Hakimu kusikiliza utetezi huo akaamua kupunguza adhabu na kuamuru kwenda jela miezi 5, ili iwe fundisho kwa watu wengine wenye tabia kama hizo